Швейцариядаги Бергюн қишлоғи маъмурияти сайёҳларга қишлоқни суратга олишни тақиқлаб қўйишга қарор қилди. Бунга эса қишлоқдаги манзаралар жуда чиройлилиги сабаб бўлди. Бу ҳақда сайёҳлик бўйича маҳаллий офис маълум қилди. 

Швейцариянинг шарқида тоғлар орасида жойлашган қишлоқ кенгаши бу тақиқловни киритиш учун 29 май куни овоз берган. "Таътилда олинган ва ижтимоий тармоқларда жойлаштирилган чиройли суратлар уларни томоша қилувчиларни ўша гўзал масканда эмасликлари сабабли бахтсиз қилиши илмий исботланган", деб айтилди хабарда. 

Қишлоқ мэри Питер Николай сайёҳларни Бергюнга келиб, бу барча чиройни ўз кўзлари билан кўришга чорлади. Сайёҳлик офиси қишлоқ суратларини ижтимоий тармоқлардаги аккаунтларидан ўчириб ташлаган. Бундан буён қишлоқни суратга оладиганларга 5 евролик жарима солинади.

Қишлоқнинг сайёҳлик бўйича директори Марк-Андреа Барандуннинг айтишича, бундай тақиқлов қишлоққа эътиборни жалб қилишга қаратилган реклама ҳийласи ҳисобланади. Шу билан бирга унинг таъкидлашича, бу меъёр ҳазил эмас, у чинакамига маҳаллий маъмурият томондан тасдиқланган. Барандуннинг таъкидлашича, амалиётда бу "қоидабузарлик" учун жарима солиш жазоси қўлланиши даргумон.