Афғонистон хавфсизлик кучлари ИШИД террорчилик гуруҳи жангарилари томонидан мамлакат шарқидаги Нангархор вилоятида режалаштирилган қатор терактлар сериясининг олдини олишди. Бу ҳақда Khaama Press агентлиги хабар берган.

Вилоят губернаторининг хабар беришича, жангарилар худкуш террорчилар ёрдамида ҳукумат муассасалари, шунингдек, Жалолобод шаҳридаги хавфсизлик кучларига ҳужум қилишни режалаштирган.

Аввалроқ Афғонистон махсус хизматлари Нангархор вилоятида пайшанба куни олти нафар худкуш террорчини қўлга олгани хабар қилинганди.

Кобулда эса кучли портлаш чоршанба куни эрталаб президентлик саройи ва хорижий элчихоналар биноларидан унча узоқ бўлмаган ерда рўй берди. Сўнгги маълумотларга кўра, ҳодиса оқибатида 100 киши ҳалок бўлди, 600 нафар инсон жабрланди. ИШИД террорчилик гуруҳи портлаш учун масъулиятни ўз зиммасига олди.