Хитой Халқ Республикаси раиси Си Цзиньпин ШҲТга аъзо давлатлар раҳбарлари Кенгаши йиғилишида ва Остона шаҳридаги «Экспо–2017» кўргазмаси очилиш маросимида иштирок этади, дейилади ХХР ТИВ расмий вакили Лу Канг томонидан эълон қилинган хабарда. 

ШҲТ саммити 8–9 июнь кунлари Қозоғистон пойтахти Остона шаҳрида бўлиб ўтади.

«Қозоғистон президенти Нурсултон Назарбоевнинг таклифига биноан ХХР раиси Си Жинпинг 7 июндан 10 июнга қадар Қозоғистонга расмий ташриф уюштиради, Шангҳай ҳамкорлик ташкилотига аъзоларининг давлат раҳбарлари Кенгашининг 17-йиғилишида, шунингдек, Остона шаҳридаги «ЭКСПО»нинг очилиш маросимида иштирок этади», — дейилади ХХР ТИВ расмий сайтижа эълон қилинган хабарда.

ШҲТ — 2001 йилда Хитой, Россия, Қозоғистон, Тожикистон, Қирғизистон ва Ўзбекистон етакчилари томонидан асос солинган халқаро ташкилот ҳисобланади. 2016 йил июнида Ўзбекистонда ўтказилган саммитда Ҳиндистон ва Покистоннинг ҳам ташкилотга аъзо қилиб олиниши ҳақида меморандум имзоланган эди. 

Айни пайтда ШҲТда Афғонистон, Беларусь, Эрон ва Мўғулистон кузатувчи-давлатлар, Озарбойжон, Арманистон, Камбожа, Непал, Туркия ва Шри-Ланка ҳамкор давлатлар мақомига эга.