2017 йилнинг 29 март куни тахминан соат 09:00 да, номаълум шахс ўзганинг мол-мулкини яширин равишда талон-торож қилиш мақсадида, Сергели туманида жойлашган Дилшод Яминовнинг (жабрланувчининг анкета маълумотлари ўзгартирилган) хонадони кириш эшиги қулфига калит танлаш йўли билан, ғайриқонуний равишда кириб, 3.133.830 сўмлик мол-мулкини ўғирлаган, деб хабар бермоқда Тошкент шаҳар Ички ишлар бош бошқармаси. 

Мазкур ҳолат юзасидан Сергели тумани ИИБ ҳузуридаги Тергов бўлими томонидан Ўзбекистон Республикаси ЖКнинг 169-моддаси 2-қисми “г” банди (ўғирлик, яъни ўзганинг мол-мулкини яширин равишда уй-жойига ғайриқонуний равишда кириб, талон-торож қилиш) аломатлари билан жиноят ишлари қўзғатилган эди. 

Тошкент шаҳар ИИББ ходимлари томонидан олиб борилган тергов-тезкор тадбирлари натижасида, мазкур жиноят Сергей Владимирович Заводской ва Александр Викторович Бузичкинлар томонидан содир этганлиги аниқланиб, улардан турли хил калитлар тўплами ва қўлқоплар далилий ашё сифатида олинган. 

Фото: Тошкент шаҳар ИИББ

Бундан ташқари Заводской ва Бузичкинлар Тошкент шаҳри ҳудудида калит танлаш йўли билан бир нечта ўғирлик жиноятларини содир этишганлиги аниқланган. Заводской ва Бузичкинга нисбатан қамоққа олиш тарзидаги эҳтиёт чораси қўлланилган. 

Ҳозирда дастлабки тергов ҳаракатлари давом эттирилиб, уларнинг бошқа жиноятларга алоқадорлиги текширилмоқда. 

Юқоридаги шахснинг хатти-ҳаракатидан кимдир жабр кўрган бўлса, “102” телефон рақамига ёки яқин атрофдаги ички ишлар идораларига мурожаат этиши мумкин.