АҚШ президенти Дональд Трамп Германия канцлери Ангела Меркель, Франция президенти Эммануэль Макрон, Канада бош вазири Жастин Трюдо ва Буюк Британия бош вазири Тереза Мэй билан телефон мулоқоти ўтказиб, АҚШни иқлим бўйича Париж келишувидан олиб чиқиш ҳақидаги қарорини тушунтириб берди.

Трамп суҳбат чоғида барча 4 етакчига бу масала бўйича олиб борган "очиқ, сермазмун мунозаралари" учун миннатдорчилик билдирган.

У, шунингдек, хорижлик ҳамкасбларини "Америка аввалгидек Трансатлантик альянс ва атроф-муҳитни муҳофаза қилиш бўйича қатъий саъй-ҳаракатлар тарафдори эканлигига" ишонтирди. 

Трамп мулоқот давомида АҚШ зарарли чиқиндиларни камайтириш борасида сезиларли муваффақиятларга эришгани ва экологик тоза энергетика технологияларини ривожлантиришга кўмак бераётганини таъкидлаб ўтди. Унинг айтишича, АҚШ унинг маъмурияти вақтида Ердаги энг соф ва экологик тоза давлатга айланади.

"Барча етакчилар мулоқотни давом эттиришга ҳамда келгусида экологик ва бошқа масалалар бўйича ҳамкорликни фаоллаштиришга келишиб олдилар", деб айтилган хабарда.

Аввалроқ Трамп Оқ уйдаги маросимда АҚШнинг иқлим бўйича келишувдан чиқишини эълон қилганди. Трамп АҚШ Париж келишувига қайта кириш ёки "АҚШ, унинг корхоналари, ишчилари, одамлари ва солиқ тўловчилари учун адолатли шартларга асосланган янги битим" тузиш бўйича музокаралар олиб боришни бошлашини айтган.

Европа Иттифоқи маъмурияти ҳамда иттифоқнинг бир қатор етакчи давлатлари Трампнинг бу қароридан ҳафсалалари пир бўлганини маълум қилишган.