Канадада ҳамшира Элизабет Веттфлауэр Онтарио вилоятидаги қариялар уйида яшовчи 8 нафар кекса ёшли кишини ўлдирганини тан олди.

Ҳамширанинг тан олишича, у инсулин инъекциялари ёрдамида 2007 йилдан 2014 йилгача давр оралиғида 75 ёшдан 96 ёшгача бўлган 5 аёл ва 3 эркакни атайлаб ўлдирган.

Аёл бу қотилликларни нима сабабдан амалга оширгани номаълум. Унга умрбод қамоқ жазоси берилиши мумкин.

Маҳаллий ҳуқуқни ҳимоя қилиш гуруҳи CARP фаолининг фикрича, Веттфлауэр иши қариялар уйларида яшовчиларга нисбатан зўравонликлар қўлланиши бўйича кўплаб ҳодисалар денгизидаги бир томчидир.

"Кўплаб йиллар давомида қариялар уйида яшовчилар улар ҳақида ғамхўрлик қилиниши керак бўлган муассасаларда яхши парваришланмасликдан, ёмон муносабат ва зўравонликдан азият чекишлари ёки ҳаттоки ўлишлари ҳақидаги воқеаларни эшитиб келамиз", деб айтди CARP ташкилоти вице-президенти Ванда Моррис.