Туркия муайян шартлар мавжудлигида Туркманистон газининг Европага транзитини таъминлаши мумкин, деб айтди Туркиянинг Ашхободдаги элчиси Мустафо Капужу. Элчи Халқаро энергетик хартиянинг Ашхобод форуми доирасида "Анадолу" ахборот агентлиги саволларига жавоб берди.   

"Анқара энергоресурсларни етказишни диверсификациялаш сиёсати доирасида Туркманистоннинг газ лойиҳаларини қўллаб-қувватлайди", деб айтди Капужу.   

Элчи Туркия Туркманистоннинг мустақиллигини биринчи бўлиб тан олганини ва Ашхободда элчихона очганини эслатиб ўтди. 

Капужунинг айтишича, ўтган 25 йил ичида икки томонлама муносабатларда катта тараққиёт қайд қилинган. 

""Бир миллат – икки давлат" ибораси Туркия ва Туркманистонга ҳам тааллуқлидир. Икки давлат муносабатлари юқори даражада қолмоқда. 2013 йилда икки давлат ўртасидаги савдо айланмаси энг юқори кўрсаткич – 3 млрд долларни ташкил қилган, бироқ глобал инқироз туфайли ундан кейинги йилларда бу кўрсаткичнинг пасайиши кузатилган", деб айтди элчи.    

Элчининг маълум қилишича, 2016 йил натижаларига кўра, Анқара ва Ашхобод ўртасидаги савдо айланмаси 1,7 млрд долларни ташкил қилган.  

"Турк қурилиш компаниялари бугунги кунгача Туркманистонда 50 млрд долларлик лойиҳаларни амалга оширишган. Туркманистоннинг йирик инфратузилмавий лойиҳалари турк компанияларига топширилган", деб таъкидлаб ўтди Туркия элчиси.