Австрияда ксенофобия ва исломофобияга асосланган жиноятлар сони ўсиб бормоқда. Бу ҳақида "Анадолу" агентлиги хабар берди

Мамлакатда мусулмонларнинг муқаддас Рамазон ойи арафасида исломофобия белгилари яққол кўзга ташлана бошлади. 

Бир ҳафта давомида мамлакатдаги икки масжид ҳамда Венадаги Австрия Ислом диний ҳамжамияти деворида номақбул мазмундаги ёзувлар пайдо бўлди. Бундан ташқари, Тироль шаҳри масжидига жума намозидан сўнг чўчқа калласи ташлаб кетилди. Шу кунларда ҳижоб кийган аёллар ҳам ҳақоратлар ва жисмоний босимга йўлиқишмоқда. Буларнинг барчаси Австриядаги мусулмонларга нисбатан бетоқатлик кўламининг ўсишидан далолат беради. 

Бундан ташқари, май ойининг бошида Австрия парламенти томонидан қабул қилинган аёлларнинг жамоат жойларда ниқобда юришини тақиқловчи қонун лойиҳаси ҳам хавотирга сабаб бўлмоқда. 

Австриядаги Ислом диний ҳамжамияти раҳбари Иброҳим Олгун "Анадолу"га Австрия мусулмонлари Рамазон ойини тинчлик, хотиржамликда ўтказишни исташи, бироқ мамлакатдаги беш ислом ташкилотига бўлган муносабат уларда хавотир уйғотаётгани ҳақида айтган.

Олгуннинг сўзларига кўра, радикалларнинг акциялари мусулмонларга нисбатан ёвларча муносабатнинг ўсаётганидан далолат бермоқда.

Диний ташкилот раҳбари шунингдек мамлакатдаги вазиятни инкор этаётган Австрия ҳуқуқ-тартибот органлари ва сиёсатчиларнинг позициясидан ташвишда эканини билдирган.