Черногория бугун, 5 июнда Вашингтондаги расмий маросим вақтида НАТО сафига расман қабул қилинади ва мамлакат ичида ўтган норозилик намойишларга қарамасдан, НАТОга аъзо давлатлар ўртасида энг кам ҳарбий бюджетга эга унинг кучсиз аъзоларидан бирига айланади.  

НАТО келишувига кўра, давлатнинг ташкилотга қўшилиши келишувга қўшилиш ҳақидаги ҳужжатни АҚШга сақлаш учун топшириш билан кечади. Шу муносабат билан Черногория бош вазири Душко Маркович бу ҳужжатни Вашингтонда АҚШ давлат котиби ўринбосари Томас Шеннонга НАТО бош котиби Йенс Столтенберг кўз ўнгида топширади.

7 июнь куни эса Черногория байроғи НАТОнинг Брюсселдаги бош қароргоҳи, НАТОнинг Европадаги бирлашган қуролли кучлари олий қўмондонлигининг Бельгиянинг Монс шаҳридаги ва НАТОнинг трансформация бўйича стратегик қўмондонлигининг АҚШнинг Норфолкдаги қароргоҳларида кўтарилади.