Ўзбекистонда гидроэнергетикани ривожлантиришга жалб этилаётган хорижий кредитлар ҳажми 1 млрд доллардан кўпроқни ташкил этади. Бу Ўзбекистон Президенти қарорида назарда тутилган (PDF).

Ҳужжат билан Ўзбекистонда 2017-2021 йилларда гидроэнергетикани ривожлантириш бўйича чора-тадбирлар дастури тасдиқланди, у умумий қиймати 2,65 млрд доллар бўлган 18 та янги гидроэлектростанцияни қуриш ва 14 тасини модернизация қилишни назарда тутган.

Дастурни амалга ошириш орқали Ўзбекистондаги ГЭСлар қуввати 2026 йилга келиб 1,7 баробарга ошади - 3,038 МВт.гача. 

Дастур Ўзбекистоннинг 1,64 млрд долларлик ўз маблағлари ва халқаро ҳамда хорижий молия институтларининг 1,009 млрд доллар миқдоридаги маблағлари ҳисобидан молиялаштирилади.

Хусусан, дастур доирасида Хитой Эксимбанкидан 572,8 млн доллар, Ислом тараққиёт банкидан – 181,1 млн доллар, Осиё инфратузилмавий сармоялар банкидан – 77,3 млн доллар, Осиё тараққиёт банкидан – 98,4 млн долларлик кредитларни жалб этиш режалаштирилган.

Дастурга тахминий қиймати 1,7 млрд доллар бўлган 42 та истиқболли лойиҳалар ҳам киритилган. Улар гидроэнергетика соҳасида 2030 йилга қадар амалга оширилади.