Неаполь шаҳридаги қаҳвахоналардан бири Мадриднинг «Реал» клуби ҳужумчиси Криштиану Роналдуга ЕЧЛ финалида «Ювентус» дарвозасига урилган иккита гол учун бепул қаҳва таклиф қилди. Бу ҳақда Real Madrid Info хабар берган.

«Ювентус» либосида кўчага олиб чиқиб қўйилган манекенга португалияликка аталган ёзувлар бўлган қоғоз осиб қўйилди.

«Роналду, агарда бу ерга кирсанг, бепул қаҳва ичишинг мумкин», - дейилади футболчига аталган хабарда.

«Ювентус»га бағишланган бошқа бир ёзувда эса шундай дейилади: «Улар фақатгина Италияда ўғирлик қилишлари мумкин. Европада эса ўхшамайди».

Эслатиб ўтамиз, 3 июнь куни Мадриднинг «Реал» ЕЧЛ финалида «Ювентус»ни тор-мор келтирди ҳамда бу мусобақада қаторасига иккинчи бор зафар қучган илк клубга айланди.