Россия ва Туркия президентлари Владимир Путин ва Ражаб Тоййиб Эрдўған телефон мулоқоти давомида Суриядаги вазиятни тартибга солиш бўйича биргаликдаги саъй-ҳаракатларни жанговар тўқнашувлардан холи ҳудудларни яратиш контекстида давом эттиришга келишиб олдилар. Бу ҳақда Кремль матбуот хизмати маълум қилди.     

Суриядаги вазиятни тартибга солиш бўйича Остонада 4 та учрашув ўтказилди. Бу учрашувларнинг асосий натижалари Сурияда жанговар ҳаракатларни тўхтатиш тартибини кузатиш бўйича қўшма тезкор гуруҳ яратиш ҳақидаги низом бўйича келишувга эришиш ва кафил давлатлар – Россия, Туркия ва Эрон томондан Сурияда зўравонликни тугатиш, унинг ҳудудий яхлитлиги ва бирлигини сақлаб қолиш ҳамда Сурия ихтилофини сиёсий йўл билан ҳал қилишга қаратилган, Сурияда жанговар ҳаракатлардан холи ҳудудларни яратиш ҳақидаги меморандумнинг имзоланиши бўлди.

Путин ва Эрдўған, шунингдек, Москва ва Анқара ўртасидаги иқтисодий алоқаларни тўлиқ тиклаш бўйича ишларнинг муваффақиятли бораётганини қайд қилиб ўтишди.    

"Шунингдек, икки томонлама ҳамкорликнинг баъзи масалалари муҳокама қилинди. Жумладан, Россия-Туркия савдо-иқтисодий алоқаларини тўлиқ тиклаш ва "Турк оқими" газ қувури лойиҳасини амалга ошириш бўйича ишларнинг муваффақиятли бораётгани қайд қилинди", деб айтилган хабарда.     

2 июнда Россия ҳукумати помидорлардан ташқари барча турк маҳсулотлари етказиб берилишига тақиқловни бекор қилди.