«Qonli Tehron». Teraktlar bo‘yicha so‘nggi ma'lumotlar

IShID Eron poytaxti Tehron shahrida, parlament binosi va imom Xomeyni maqbarasi binolariga uyushtirilgan hujumlar uchun javobgarlikni zimmasiga olgan. Bu haqda Fars agentligi xabar tarqatdi.

Tehronning ikki nuqtasida amalga oshirilgan terakt qurbonlari soni 8 nafarni tashkil qilmoqda, 33 kishi jarohatlangan.

Parlamentga hujum
7 iyun kuni tongida 3 nafar qurollangan terrorchi parlament binosiga kirib, otishma boshladi. Tasnim agentligi xabariga ko‘ra, bu hujum davomida 7 kishi halok bo‘ldi, 4 kishi garovga olindi.

Fars agentligi hujum qilganlardan biri xudkush ekani, u maxsus xizmatlar xodimlari tomonidan qurshab olingach, o‘zini portlatgani haqida xabar berdi.

Yana bir jangari parlament binosini tark etgan va ko‘chada otishmani davom ettirgan. Bino ichida terrorchilardan biri yo‘q qilingani aytilmoqda, ammo bu rasman tasdiqlangani yo‘q.

Deputatlar parlament binosidan evakuatsiya qilingan. Ular orasida jabrlanuvchilar yo‘q.

Maqbaradagi portlashlar
Parlamentga hujum bilan bir vaqtda shaharning boshqa qismida imom Xomeyni maqbarasida portlash sodir bo‘ldi. Bu yerda hujum qilganlar 4 kishi bo‘lib, ular orasidagi ayol hujum boshidayoq o‘zini portlatib yuborgan.

Yana bir hujum qiluvchi qo‘riqchilar tomonidan yo‘q qilingan, uning yonidan 8ta granata, 10ta o‘qdon va o‘t qo‘yish uchun yoqilg‘i solingan butilka topilgan.

Keyinroq jangarilardan biri bino ichida o‘zini portlatgani haqida xabar berildi, keyinroq u bunga ulgurmagani aytildi.

Maqbaraga hujum oqibatida bir kishi halok bo‘lgani va 5 kishi yaralangani ma'lum qilingan.

Eron razvedka vazirligi Tehron ahlidan ko‘chalarga chiqmaslikni so‘ramoqda. Mamlakat IIV rahbari Abdulrizo Rahmon Fazli favqulodda yig‘ilish chaqirgan.