Хитой бутун дунё бўйлаб, жумладан АҚШ ҳукумати компьютерларига киберҳужумлар амалга оширади. Бу ҳақда Пентагоннинг Хитой ҳарбий салоҳияти ҳақида конгрессга топширган ҳар йиллик ҳисоботида айтилган.

"Бутун дунёдаги компьютер тизимлари, шу жумладан АҚШ ҳукуматига тегишли тизимлар, 2016 йилда Хитой томондан ҳужумларга учраб турган. Ҳужум тармоқларни баҳолаш ва маълумотлар олишга қаратилган бўлган. Хитой киберсоҳадаги салоҳиятини АҚШнинг дипломатик, иқтисодий ва ҳарбий-саноат соҳаларидаги маълумотларни йиғиш учун қўллайди", деб айтилган ҳисоботда.    

Пентагоннинг фикрича, олинган маълумотлар Хитойнинг юқори технологиялар саноатида, ҳарбий модернизациялашда ва АҚШ элитаси истакларини баҳолашда қўлланиши мумкин. Бундан ташқари, хитойлик ҳарбийлар бу йўл билан АҚШнинг мудофаа инфратузилмаси, логистикаси ва ҳарбий салоҳияти ҳақида маълумотларни қўлга киритишлари мумкин. Бироқ Хитойга қўйилаётган ушбу айбловларни исботловчи аниқ далиллар келтирилмаган. 

АҚШ бир неча маротаба Хитойни бош кибертаҳдидлардан бири деб атаган. 2011 йилдаёқ АҚШнинг миллий контрразведка бошқармаси конгрессга топширган ҳисоботида хитойлик хакерлар энг кўп иқтисодиёт ва мудофаа билан боғлиқ маълумотлар сақланувчи серверларга киришга фаол равишда уринишларини маълум қилган. Хитой эса ўз навбатида бу айбловларни рад этиб келади ва аксинча, АҚШни Хитой интернетида фаолликда айблайди.