Аргентиналик ҳужумчи Лионель Месси «Барселона» раҳбарияти билан янги шартноманинг барча пунктлари бўйича келишиб олган.

ESPN хабарига кўра, келишув 2021 йилгача тузилади.

Шартномада футболчининг бадал пули сифатида 400 миллион евро миқдоридаги маблағ кўрсатилган (аввалгиси 250 миллион евро эди).

Бундан аввал нашрлар янги шартномага кўра аргентиналик футболчи жами 120 миллион евро маош олиши айтилганди.

Янги шартнома 30 июндан кейин имзоланиши кутилмоқда.

Амалдаги шартнома муддати 2018 йилга қадар тузилган.

Қайд этиш керакки, Месси ва жамоанинг янги шартнома борасидаги музокаралари бир йилдан буён давом этмоқда. Ўтган вақт давомида томонлар шартнома бўйича келишувга эришилгани ҳақида ўнлаб марта хабар қилишганди.

Месси «Барселона» сафида 2004 йилдан буён тўп суриб келмоқда. Испания чемпионатининг якунланган мавсумида 29 ёшли ушбу ҳужумчи 34 учрашувда майдонга тушди ва 37 гол урди ҳамда 10 марта голга пас берди. У, шунингдек, жамоа таркибида Чемпионлар Лигасида 9та ўйин ўтказди ва 11та гол киритишга муваффақ бўлди. Ушбу мавсумда «Барселона» Испания Примерасида иккинчи ўринни олган бўлса, Чемпионлар Лигасининг чорак финалига қадар етиб борди.