Prezident Toshkent aholisiga birlamchi tibbiy-sanitariya yordami ko‘rsatish tizimiga oid qarorni imzoladi

O‘zbekiston Respublikasi Prezidentining “Toshkent shahri aholisiga birlamchi tibbiy-sanitariya yordami ko‘rsatishni boshqarish tizimini yanada takomillashtirish hamda uning samaradorligi uchun rahbarlar va mutaxassislarning kasbiy mas'uliyatini oshirish chora-tadbirlari to‘g‘risida”gi qarori chiqdi.

Qaror bilan aholiga birlamchi yordam ko‘rsatish tibbiy muassasalarining boshqaruv tizimini yanada takomillashtirish va uning faoliyati samaradorligini oshirish, ambulatoriya-poliklinika muassasalarining tez tibbiy yordam ko‘rsatish xizmati, statsionarlar va ixtisoslashtirilgan tibbiy yordam markazlari bilan o‘zaro hamkorligining amaliy mexanizmlarini joriy etish, shuningdek, Toshkent shahri aholisi uchun qulay va malakali birlamchi tibbiy-sanitariya yordami ko‘rsatilishi yuzasidan ular rahbarlari va mutaxassislarining shaxsiy mas'uliyatini kuchaytirish maqsadida:

Toshkent shahrining tuman markaziy ko‘p tarmoqli va oilaviy poliklinikalarining, shuningdek, ular rahbarlari va mutaxassislarining asosiy vazifalari etib quyidagilar belgilandi:

aholiga eng ko‘p uchraydigan kasalliklarni profilaktika qilish va davolash bo‘yicha alohida bemorlar hamda butun oila darajasida tibbiy xizmatlar ko‘rsatish;

aholiga malakali birlamchi, birinchi navbatda kasalliklarni profilaktika qilish masalalarida tibbiy-sanitariya yordami ko‘rsatish, tug‘ruq yoshidagi ayollar, o‘smir qizlar, homilador ayollar, bolalar, shuningdek, yolg‘iz keksalar, nogironlar, surunkali kasalliklarga chalingan bemorlar hamda o‘zgalar ko‘magiga va ijtimoiy yordamga muhtoj shaxslar o‘rtasida doimiy patronaj ishlarini amalga oshirish;

oilada tibbiy madaniyatni oshirish va har bir kishining o‘z salomatligi va bolalari salomatligi uchun mas'uliyatini oshirishga yo‘naltirilgan dasturlarni amalga oshirish orqali aholi o‘rtasida sog‘lom turmush tarzi asoslarini shakllantirish va mustahkamlash;

aholi o‘rtasida barkamol sog‘lom avlodni tarbiyalashga, ona va bola salomatligini muhofaza qilishga, tibbiy etika va deontologiya, sanitariya-gigiyena ko‘nikmalari, oqilona ovqatlanish qoidalariga rioya etishga, tug‘ma patologiya va irsiy kasalliklarni kamaytirishga yo‘naltirilgan profilaktika tadbirlarini tashkil etish va amalga oshirish;

milliy kalendarga binoan profilaktika emlashlarini o‘tkazish yo‘li bilan boshqariladigan infeksiyalar va ularning asoratlarini profilaktika qilish;

yuqumli bo‘lmagan kasalliklarga chalinish xavfi omillarini barvaqt aniqlash mexanizmlarini joriy etish yo‘li bilan aholi o‘rtasida kasallikka chalinish, nogironlikni va barvaqt o‘limni profilaktika qilish;

malakali mutaxassislarni jalb etgan holda, klinik, biokimyoviy laboratoriya va instrumental tadqiqotlar o‘tkazish orqali aholining bevosita yashash joylarida profilaktik tibbiy ko‘riklar tashkil etish yo‘li bilan kasalliklarni barvaqt aniqlash va ularning surunkali kasalliklarga aylanib ketishiga yo‘l qo‘ymaslik;

tunu kun faoliyat ko‘rsatadigan mobil, diagnostika va davolash standartlariga muvofiq yaxshi jihozlangan tez tibbiy yordam kichik stansiyasidan foydalangan holda, shifoxonaga yotqizishdan oldingi tez va shoshilinch tibbiy yordam ko‘rsatish, shuningdek, surunkali kasalliklarga chalingan bemorlarni muntazam kuzatib turishni, sog‘lomlashtirishni va reabilitatsiya qilishni ta'minlash;

yuqumli kasalliklar, zaharlanishlar va favqulodda vaziyatlar to‘g‘risida tegishli xizmatlarni o‘z vaqtida xabardor qilish, shuningdek, sanitariya-gigiyena va epidemiyaga qarshi tadbirlarni o‘tkazish, biriktirilgan uchastka va uy xo‘jaliklarida  sanitariya barqarorligi holatining umumiy nazoratini amalga oshirish, yuqumli kasalliklar o‘choqlarida observatsiya tadbirlarini o‘tkazish, aholini xavfli epidemik vaziyat to‘g‘risida ogohlantirish;

rahbarlar va mutaxassislarning biriktirilgan aholi oldida va xalq deputatlari shahar Kengashi sessiyalarida kamchiliklarni va muammoli masalalarni bartaraf etish, ish shakllari va usullarini yanada takomillashtirish, shuningdek, manzilli birlamchi tibbiy-sanitariya yordamining samaradorligini oshirish yuzasidan har chorakda hisobot berish tizimini joriy etish.

O‘zbekiston Respublikasi Sog‘liqni saqlash vazirligi:

bir oy muddatda Toshkent shahri hokimligi bilan birgalikda har bir tumanda ushbu qarorda belgilangan vazifalarni amalga oshirish, shuningdek, oilaviy va tuman markaziy ko‘p tarmoqli poliklinikalari rahbarlari va mutaxassislarining mas'uliyatini oshirish yuzasidan maxsus seminarlar o‘tkazadi;

bir oy muddatda oilaviy poliklinikalar rahbarlari va mutaxassislarining biriktirilgan fuqarolarning o‘zini o‘zi boshqarish organlari aholisi oldida, tuman markaziy ko‘p tarmoqli poliklinikalari rahbarlari va mutaxassislarining xalq deputatlari shahar Kengashi sessiyalarida har chorakda hisobot berish tizimi tartibini  ishlab chiqadi va amaliyotga joriy etadi;

Toshkent shahrining oilaviy va tuman markaziy ko‘p tarmoqli poliklinikalari tomonidan ko‘rsatilayotgan tibbiy xizmatlar hajmlarini ushbu qarorning 1-4-ilovalaridan kelib chiqqan holda, bir oy muddatda qayta tasdiqlaydi;