Россия президенти Владимир Путин Хитой раиси Си Цзиньпиннинг Москвага бўлғуси ташрифини икки давлат муносабатларидаги жорий йилдаги асосий воқеа бўлишини айтди. 

"Биз ҳозир икки томонлама муносабатлардаги бош тадбирга – Сизнинг Россияга келишингизга тайёргарлик кўрмоқдамиз", деб айтган Путин Си Цзиньпин билан учрашувда.

Путиннинг эслатиб ўтишича, яқинда Москвага Хитой ташқи ишлар вазири Ван И келган. У россиялик ҳамкасблари билан бирга Хитой раисининг Москвага келишига тайёргарлик билан шуғулланган. Путин бу ташриф "икки томонлама муносабатлардаги муҳим ва катта воқеа" бўлишига ишонч билдирди.  

Си Цзиньпин 8 июнда Путин билан учрашувда Россияга янги муваффақиятларга эришишни тилаб қолди. У, шунингдек, россияликларни яқинлашиб келаётган Россия куни билан табриклади.

"Сизнинг иродали раҳбарлигингиз остида Россия давлат ривожланиши ва тикланиши йўлида янги муваффақиятларга эришишини чин дилдан тилайман", деб айтган Хитой раиси. 

Хитой етакчиси жорий йилда турли майдонларда Путин билан кўплаб учрашувлар ўтказаётганини қайд қилиб ўтди. "Бу Хитой-Россия муносабатлари бугунги кунда юқори даражада эканлигидан ҳамда стратегик характер ва барқарорликка эгалигидан дарак беради. Мураккаб халқаро вазият вақтида бизнинг муносабатлар жуда яхши ривожланмоқда. Бизнинг ҳамкорлик ва ўзаро қўллаб-қувватловимиз дунё учун глобал миқёсда катта аҳамиятга эга", деб ишонч билдирди Си Цзиньпин. 

Икки етакчининг аввалги учрашуви 14 май куни Пекинда "Бир макон, бир йўл" халқаро форуми вақтида бўлиб ўтганди.

Хитой раисининг Москвага ташрифи июль бошига белгиланган. Си Цзиньпин охирги марта Москвага 2015 йил майида келганди.