Тошкент ИИББда бўлиб ўтган матбуот брифингида 1-7 июнь кунлари пойтахт йўлларида қайд этилган қоидабузарликлар юзасидан ахборот берилди. Йўл ҳаракати хавфсизлиги қоидаларини бузиш ҳолатларини олдини олиш мақсадида олиб борилган тадбирлар натижасида ҳафта давомида йўл ҳаракати хавфсизлиги ходимлари томонидан 20 минг 518та, чорраҳаларга ўрнатилган кузатув камералари ёрдамида 7774та қоидабузарликлар аниқланиб, тегишли маъмурий баённомалар расмийлаштирилди.

Хусусан, чорраҳалардаги камералар воситасида қайд этилган қоидабузарликларнинг 4183таси светофорнинг тақиқловчи ишорасида ҳаракатланиш, 3591таси тезликни белгиланган меъёрдан оширишдир. 

Ҳафта давомида 17 та йўл-транспорт ҳодисаси содир бўлиб, 1 киши ҳалок бўлиб, 18 нафар фуқаро тан жароҳати олган. Ўтган йилнинг шу даврида 42та ЙТҲ содир бўлиб, 2 нафари ҳалок бўлган, 59 фуқаро тан жароҳати олган. 

2017 йил 15 март куни кузатув камералари жорий этилгандан сўнг, йўл-транспорт ҳодисалари сони 264тани ташкил этиб, ўтган йилнинг шу даврига нисбатан 126тага, 
ҳодисалар оқибатида ҳалок бўлганлар сони 24 нафарга (33 киши ҳалок бўлган), тан жароҳати олганлар сони 304 нафарни ташкил этиб, ўтган йилга нисбатан 162 кишига камайган.