Каталония женералитети президенти Карлес Пучдемон Испания таркибидаги мухтор ҳамжамиятнинг мустақиллиги бўйича референдум жорий йилнинг 1 октябрида ўтишини эълон қилди. У вилоят аҳолисини агар улар Каталонияни мустақил кўрмоқчи бўлсалар, овоз беришда иштирок этишга чақирди. Бу ҳақда El Mundo нашри хабар бермоқда. 

Пучдемон Испания ҳукумати референдум ўтказилишига рухсат беришдан бош тортганига қарамасдан, овоз бериш бўлиб ўтишини эълон қилди. Бу эса референдум Испания конституциявий суди томондан бекор қилиниши мумкинлигини англатади.

Референдум иштирокчилари "Сиз Каталония республика бошқарув шаклига эга мустақил давлат бўлишини истайсизми?" деган саволга жавоб беришлари керак бўлади.

Пучдемон бу ҳақда Каталония ҳукумати маъмуриятида маълум қилди. Пучдемонгача бу ерда ҳамжамият вице-президенти Уриол Жункерас нутқ сўзлаб, Испания ҳукуматини "каталонияликларнинг овоз бериш ҳуқуқини инкор этаётгани" учун танқид қилганди.

Пучдемон Испания ҳукумати билан музокаралар учун "охирги дақиқагача эшикни очиқ қолдиришини, бироқ бир томонлама тартибда музокаралар ўтказмаслигини" айтган. 

Шунга ўхшаш вазият Каталонияда 2015 йил кузида ҳам кузатилган. Ноябрь бошида Каталония парламенти "мустақил давлат яратилиши жараёни бошланиши"ни эълон қилувчи резолюцияни қабул қилганди. Икки кун ўтиб Испания ҳукумати конституциявий судга бу резолюция устидан шикоят қилган. Декабрь бошида эса суд резолюцияни ноқонуний деб топиб, уни бекор қилган.