Жанубий Америкада ўртоқлик учрашувлари бўлиб ўтди. АҚШнинг Бока-Ратон шаҳрида кечган учрашувда Эквадор Венесуэла билан ўйнади ва 1:1 ҳисобидаги дуранг натижани қайд этди.

Эквадорликлар 29-дақиқада Микел Вильянуэванинг автоголидан кейин ҳисобни очишганди. Венесуэланинг жавоб голи 43-дақиқада Хуниор Морено томонидан урилди.

Перу эса Парагвай билан ўртоқлик учрашувида майдонга тушди. Перунинг Трухильо шаҳридаги «Карлос Мансиче» стадионида кечган учрашув мезбонларнинг кичик ҳисобдаги ғалабаси билан якунланди. 75-дақиқада «Фламенго» ҳужумчиси, «Бавария» ва «Ҳамбург» жамоаларининг собиқ футболчиси Хосе Паоло Герреро ғалаба голига муаллиф бўлди.

Боливия Никарагуага қарши ўртоқлик учрашувида охирги дақиқаларда ғалабага эга бўлди. Боливиянинг Якуиба шаҳрида ўтган учрашув мезбонларнинг 3:2 ҳисобидаги ғалабаси билан якунланди.

Мезбонларнинг голлари Диего Бехарано (39-дақиқа), Ҳильберт Альварес (48) ва Хосе Варгас (90+3) томонидан урилди. Меҳмонлар сафида голларга Хорхе Гарсия (6) ва Карлос Чаваррия Родригес (37) муаллифлик қилишди.

2018 йилги жаҳон чемпионатига саралаш баҳсларида Эквадор 14 ўйиндан 20 очко тўплаган ҳолда олтинчи, Венесуэла 6 очко билан — 10-ўринда жойлашиб турибди.

Перу ва Парагвай эса 18тадан очко жамғарган ҳолда мос равишда 7 ва 8-ўринларни эгаллаб турибди.

Жанубий Америка минтақасида 4та ўрин соҳиблари мундиалга тўғридан-тўғри йўлланма олади, бешинчи ўрин эгаси Океания вакилига қарши ўтиш ўйинида иштирок этади.

Эквадор кейинги ўйинни 14 июнь куни Сальвадорга қарши ўтказади (ўртоқлик учрашуви), венесуэлаликлар эса 31 август куни ЖЧ-2018 саралаши доирасида Колумбияга қарши майдонга тушади.

Перу 31 август куни саралаш доирасида 15-тур учрашувини Боливияга қарши ўтказади, шу куни парагвайликлар Чилига сафар қилади.

Никарагуа 17 июнь куни Кюрасаога қарши ўртоқлик учрашувида майдонга тушади.

Ўртоқлик учрашувлари
Эквадор - Венесуэла 1:1
Голлар: 1:0 - Вильянуэва (29, автогол), 1:1 - Морено (43)

Перу - Парагвай 1:0
Гол: 1:0 - Герреро (75)
Четлатиш: Рохас (74, Парагвай)

Боливия - Никарагуа 3:2
Голлар: 0:1 - Хорхе Гарсия (7), 0:2 - Карлос Чаваррия Родригес (37), 1:2 - Диего Бехарано (39), 2:2 - Ҳильберт Альварес (48), 3:2 - Хосе Варгас (90+3).