АҚШнинг Техас штатида мурғаккина опа-сингил 19 ёшли онаси томондан 15 соатга машина ичида қолдириб кетилгандан кейин оламдан кўз юмдилар.

Полиция бири 2 ёшда, иккинчиси 1 ёшда бўлган қизчаларнинг онасига айблов эълон қилди. 

"Аманда Хокинс 33 даража иссиқда қизларини машинада қолдириб, ўзининг 16 ёшли таниши билан дўстлариникига меҳмонга кириб кетган. Она 15 соатдан кейин автомобиль ёнига қайтганда, қизларини ҳушсиз ҳолда аниқлаган, бироқ уларни дарҳол шифохонага олиб бормаган. Бунинг ўрнига бадбахт она қизларини сувда чўмилтириб, ҳушига келтирмоқчи бўлган. Бироқ айблануви бу ҳаракатлари бефойда эканлигини тушунгач, шифокорларга мурожаат қилган", деб маълум қилинди Керр округи шерифи бошқармасида. 

Кўнгилхушлик қилишни қизларидан устун қўйган она шифохонага келганда, қизлари билан кўлда дам олаётганда, қизчалар қандайдир гулларни ҳидлаб ҳушларини йўқотишганини айтган. Шифокорлар қизларнинг ҳаётини сақлаб қолиша олмаган ва аёлнинг гапларига ишонишмаган, чунки у фарзандларини шифохонага ўта оғир аҳволда олиб келган. Полицияда эса аёл барчасини тан олган.