Буюк Британияда эфирга узатилувчи, автомобиллар ҳақидаги Top Gear кўрсатувининг собиқ бошловчиси Ричард Хаммонд Швейцариянинг Санкт-Галлен кантонида юз берган автофалокатдан кейин шифохонага етказилди. Бу ҳақда 20 Minuten портали хабар бермоқда

Таъкидланишича, Хаммонд бошловчилик қилувчи The Grand Tour телешоусида иштирок этган Rimac Concept One спорткари йўлдан чиқиб кетиб, ёниб кетган. Бошловчи шифохонага вертолётда етказилган.

Top Gear’нинг бошқа бир собиқ бошловчиси Жереми Кларксон твиттерда Хаммонднинг йўл-транспорт ҳодисасига учраганини тасдиқлаган. 

"Бу мен кўрган энг катта ва энг даҳшатли авария бўлди. Хайриятки, Ричардга ҳеч нарса қилмаган кўринади", деб ёзган Кларксон.

2006 йил 20 сентябрда ҳам Хаммонд Top Gear кўрсатувини Йорк ёнидаги Буюк Британия ҳарбий-ҳаво кучларининг собиқ аэродромида суратга олиш вақтида юз берган аварияда жиддий жароҳат олганди. Авария вақтида у машинада 464 км/соат тезлик билан ҳаракатланаётган бўлган. Бошловчи даволангандан кейин телешоудаги фаолиятини яна давом эттираверган.