АҚШ ҳукумати Канзас-Ситида яшовчи, содир этмаган жиноят учун 17 йиллик умрини қамоқда ўтказган Ричард Жонсни озод этди. Бу ҳақда The Kansas city star нашри хабар бермоқда. 

Жонс 1999 йилда оғир оқибатларга олиб келган ўғриликда айбланиб, 19 йиллик қамоқ жазосига маҳкум қилинганди. Унга қарши айблов гувоҳлар берган кўрсатмаларгагина асосланган бўлган.

Жонс айбсизлигини исботлаш мақсадида ҳуқуқ ҳимоячиларига мурожаат қилди. Улар эса жиноят содир этилган жой ёнида Жонсга жуда ўхшаш Рики исмли одам яшашини аниқлашган.

"Қиёфадошимнинг суратини кўрганимда, менга ҳаммаси аён бўлди", деб айтди Жонс.

Янги суд иши давомида гувоҳлар Рики ва Жонснинг суратларини таққослаб, Жонснинг айбдорлиги энди уларда шубҳа уйғотаётганини айтишган. Шу сабабли суд Жонсга чиқарилган ҳукмни асоссиз деб топиб, уни озод қилишни ҳукм қилган.