Ливия бош прокуратураси Ливиянинг собиқ етакчиси Муаммар Каддафийнинг ўғли Саиф ал-Исломнинг озодликка чиқарилишини қонунга хилоф деб ҳисобламоқда, чунки у судланган ҳамда ҳибсга олиниши ва суд олдида жавоб бериши керак. Бу ҳақда мамлакат бош прокурори вазифасини бажарувчи Иброҳим Масъуд баёнотида айтилди.

"Саиф ал-Ислом Каддафий сиртдан судланган, шу сабабли у қидирувда бўлиб, унга қўйилган айбловлар бўйича суд олдида жавоб бериши керак. Амнистия қилиш ҳуқуқи суд тизимигагина тегишли. Прокуратура Каддафий ўғлининг озод қилиниши ҳолатини тергов қилишни бошлади ва тегишли қонуний чоралар кўради ҳамда суд идоралари ҳукмининг ижро этилишига қаршилик қилаётганларни жавобгарликка тортади", деб таъкидлаб ўтилди бош прокуратура баёнотида.

Саиф ал-Ислом Каддафий 2011 йилда Зинтон шаҳридаги айирмачилар бригадаси томондан Нигер томон қочаётганда ҳибсга олинганди. У шу вақтгача Зинтонни назорат қилувчи гуруҳлардан бири "Абу Бакр ас-Сиддиқ бригадаси" томондан қамоқда ушлаб турилган. Триполи ҳакамлик суди унга 2015 йил июнда "Ливия халқига қарши содир этилган жиноятлар" айблови билан сиртдан ўлим жазоси тайинлаган. Бироқ зинтонликлар Каддафий тузуми ағдарилгандан кейин адоватлашиб юрган пойтахтдаги ҳукуматга Саиф ал-Исломни беришни қатъиян рад этганлар.  

10 июнда зинтонликлар Саиф ал-Ислом 9 июнда умумий амнистия қонуни билан озод қилинганини эълон қилишди. Маълум қилинишича, Саиф ал-Ислом озод қилингандан кейин Ливиянинг шарқидаги Ал-Байда шаҳрига йўл олган.