Delta Airlines авиакомпанияси ва Америка Банки Public Theater нотижорий ташкилотини молиялаштириш тўхтатилганини маълум қилишди. Бунга сабаб – “Юлий Цезарь” спектакли бош қаҳрамонининг АҚШ президенти Дональд Трампга ўхшаб кетишида. Бу ҳақда Reuters агентлиги хабар берди.

23 май куни Нью-Йоркда премьераси бўлиб ўтган Public Theater’нинг спектакли Уильям Шекспирнинг “Юлий Цезарь” фожиаси замонавий талқини ҳисобланади. Унда бош қаҳрамон сариқ сочли бўлиб, ишбилармонлар костюмини кийиб юради ҳамда Америка байроғи тасвирланган махсус нишонни тақиб олади. Цезарнинг рафиқаси – Кальпурния эса славянча талаффуз билан гапиради ва дизайнерлар яратган либосни кийишни хуш кўради (Дональд Трампнинг рафиқаси, Меланья Трамп асли Словениядан).

Авиакомпания вакиллари фикрича, “театр раҳбариятининг бадиий тўқималари чегарадан чиқиб кетган”. Америка Банки вакили эса спектаклни молиялаштириш тўхтатилгани ҳақида қисқа баёнот билан чиқди.