Ёғли ва юқори калорияли таом истеъмоли Альгеймер касаллигининг ривожланишини тезлаштиради ва уларнинг генлардаги хавфли мутация ташувчиларида пайдо бўлиш эҳтимолини оширади. Олимлар Journal of Neuroscience'да тақдим этган мақоласида шу ҳақда сўз боради

"APOE4 мутацияси Альцгеймер касаллиги ривожида энг аҳамиятли хавф омили ҳисобланади, бироқ унинг ҳамма ташувчилари ҳам бу касаллик қурбони бўлавермайди. Бу унинг ривожланишида бошқа баъзи омилларнинг аралашувига ишора қилади. Биз Ғарб парҳези натижасида ортиқча вазннинг тўпланиши APOE4 ташувчиларида Альцгеймер касаллиги ривожига туртки беришини аниқладик", - дейишди Лос-Анжелесдаги Жанубий Калифорния университети олимлари Александра Мозер ва Кристиан Пайк. 

Моддалар алмашинуви, холестерин ҳамда организмдаги бошқа ёғларнинг айланиши билан боғлиқ ген ҳамда APOE оқсили мия ва бошқа органлар ҳужайраларидаги энг муҳим молекулалар сирасига киради. Сўнгги тадқиқотларнинг кўрсатишича, бу гендаги мутациялар Альцгеймер касаллиги, атерсклероз ва бошқа баъзи касалликларнинг ривожланиши билан боғлиқ экан. 

Масалан, сайёра аҳолисининг тахминан 10-12 фоизида мавжуд APOE4 мутацияси Альцгеймер касаллиги ривожланиш хавфини уч баробарга оширади. Икки APOE нусхасида бундай мутация кузатилганда касаллик ривожи хавфи 12 каррага ошади, яъни уларда Альгеймер касаллигидан қочишнинг деярли иложи бўлмайди. 

Мозер ва Пайк бу борада сичқонлар иштирокида тадқиқот ўтказишди. Улардаги APOE гени инсон версиясига алмаштирилди. Кемирувчиларнинг ярми ДНК ҳудудининг нормал нусхаларига эга бўлишди, қолган сичқонлар эса - APOE4.

Сичқонларнинг ҳаётини кузатган биологлар Альцгеймер касаллигининг ривожланиши сабаби ва уни бартараф қилиш усулларини излашди. Масалан, улар сичқонларнинг мия фаолияти ва структурасидаги фарқларни ўрганиш мақсадида уларни нормал ва ривожланган мамлакатлар парҳезига хос бўлган ёғли ҳамда юқори калорияли таомлар билан боқишди.

Тадқиқот натижаларига кўра, APOE4 ташувчиларида Альцгеймер касаллигининг ривожланишига ортиқча вазн сабаб бўлган - юқори калорияли таомлар билан озиқланган ва семизликдан азият чекувчи кемирувчилар миясида APOE нормал версиясига эга сичқонларнинг асаб ҳужайраларидагига нисбатан зарарли молекулалар анча тез тўпланган.