Италия тарихида энг йирик темир йўли фалокатлартдан бири юз берган Апулия вилоятида салкам бир йил ўтиб, иккита поезд тўқнашиб кетди. Бунинг оқибатида 10 киши жароҳат олди, деб хабар берди маҳаллий ОАВ.

Тўқнашув йирик шаҳар Леччедан бир неча километр узоқликда содир бўлди. Тахмин қилинишича, бир-бирига қарама-қарши келаётган поездлар йўлдан-йўлга ўтказадиган механизмнинг бузилганлиги оқибатида тўқнашиб кетган. Бу ҳудудда ҳаракат битта темир йўлдан амалга оширилади.  

Тезлик унча юқори бўлмаганлиги сабабли жароҳатланганлар унча кўп бўлмаган ва поездларга катта талофат етмаган. Ҳаммаси бўлиб поездда 80 нафар йўловчи бўлган.

Ҳодиса жойига қутқарувчилар ва ўт ўчирувчилар етиб келишган ва йўловчиларни поездлардан эвакуация қилиб, мактаб автобусида яқин орадаги Сан-Донато аҳоли пунктига етказишган.

2016 йил июлда Апулияда йирик темир йўл фалокати юз берганди: иккита йўловчи поезди катта тезликда Андрия шаҳри яқинида тўқнашиб кетган. Тўқнашув оқибатида 23 киши ҳалок бўлган, 50га яқин киши жароҳат олган. Шунингдек, 3 та вагон буткул вайрон бўлган.