Ўзбекистон Президенти: "Бундан кейин судьялар фаолиятига биринчи навбатда халқ баҳо беради!"

Ўзбекистон 13 Июнь 2017 13444

Ўзбекистон Президенти Шавкат Мирзиёев сешанба куни мамлакатдаги суд органларининг адолатли фаолиятини таъминлашга бағишланган видеоселектор йиғилишини ўтказди. Бу ҳақида "Ахборот" дастурида хабар берилди. 

Унда қўлга киритилган натижалар билан кифояланибгина қолмасдан, соҳа ривожига танқидий ёндашиш, ҳаётнинг ўзи олдимизга қўяётган бир-биридан муҳим ва долзарб вазифаларни самарали ҳал қилиш йўллари ва механизмлари ҳақида билдирилган аниқ таклифлар, амалий ташаббуслар асосида суд идоралари, судьялар фаолиятини бутунлай янгича асосда ташкил этиш лозимлигига алоҳида эътибор қаратилди. 

Кейинги пайтда мамлакатимиз фуқаролари томонидан Ўзбекистон Президентининг Халқ қабулхоналари ва виртуал қабулхонасига бўлаётган мурожаатларнинг катта қисми айнан суд идоралари ва судьялар фаолияти билан боғлиқ экани, бу йўналишда муаммолар мавжудлигидан далолат беради, дейилди йиғилишда. 

Шавкат Мирзиёев адолат тамойилларига нечоғлик амал қилинаётганига алоҳида тўхталиб ўтди. 

"Асосий мақсадимиз - фуқароларнинг ҳуқуқ ва эркинликларини ҳимоя қилиш орқали халқимизнинг суд тизимига бўлган ишончини қатъий мустаҳкамлаш, судни том маънода адолат қўрғонига айлантиришдан иборатдир", - деди давлатимиз раҳбари. 

"Фуқаролар адолатни қарор топтириш умидида ойлаб, йиллаб сарсон-саргардон бўлиб, Президентга мурожаат қилмоқда. Шунинг ўзи судлар фаолиятига халқ томонидан берилаётган холисона баҳо эмасми?! Бундай ҳолатларга қатъий чек қўйиш вақти келди! Судьялар Олий кенгаши судьялар фаолиятига ҳар қандай ноқонуний аралашувга барҳам бериш, айбдор шахсларнинг муқаррар жавобгарлигини таъминлаш юзасида бир ой муддатда таклиф киритсин! Бир одам аралашдими, унга жазо муқаррар! Қандай оғир бўлмасин, шу қарорни қабул қиламиз", - дея таъкидлади давлат раҳбари. 

Мажлисда адолат ва маънавият тушунчаларнинг ўзаро чамбарчас боғлиқ эканига алоҳида урғу берилди. Судьялар ва юрист кадрларни тайёрлашда шу жиҳатга ҳам эътибор қаратиш замон талаби экани таъкидланди. Айнан маънавий фазилатларнинг етишмаслиги туфайли баъзи судьялар ўртасида қонунга зид ҳаракатлар содир этиш ҳолатларининг учраши қайд қилинди, адолатсиз қарорлар қаттиқ танқид қилинди. 

“2017 йилнинг олти ойи давомида етти нафар судья жиноятга қўл урган. Андижон ҳўжалик судининг ўринбосари катта миқдордаги пора билан қўлга тушди. Одамлар судларга ишонмаяпти. Сирдарё, Андижон, Тошкент вилояти ва шаҳри судьялари томонидан ҳам қонунбузарликлар содир этилган. Судьялар томонидан йўл қўйилаётган таъмагирлик ҳолатларини кечириб бўлмайди” деди жумладан президентимиз.

Олий Суд кенгаши олдига бундай камчиликларни бартараф этиш вазифаси қўйилди. Шу мақсадда илгари сурилган муҳим бир фикр - ҳар бир судья томонидан аҳоли билан жойларда бир ойда камида бир марта очиқ мулоқотлар ташкил этиш ҳақидаги таклиф мажлис иштирокчилари томонидан тўлиқ маъқулланди. Шунингдек судья лавозимида фаолият кўрсатаётган суд ходимлари ўз фаолияти юзасидан халқ депутатлари маҳаллий кенгашларида ахборот бериши билан боғлиқ амалиётни йўлга қўйиш вақти келгани уқтириб ўтилди. "Бундан кейин судьялар фаолиятига биринчи навбатда халқ баҳо беради", - деди давлат раҳбари. 

Кун янгиликлари
Қўшимча-контракт асосида ўқишни истайдиганлар нима қилиши керак?
11:30 / 18.08.2017 49579 Ўзбекистон
Судьянинг нохолислиги ёки давлат телеканалининг “шохи” борми?
19:21 / 17.08.2017 103397 Жамият
Хорижга чиқиш учун биометрик паспортнинг амал қилиш муддати неча йил бўлади? 
12:01 / 17.08.2017 52988 Ўзбекистон
Parus оилавий марказида хоррор-квестлар, лазерли отишма ўйини ва бошқа янгиликлар тайёрланди. Марҳамат
10:14 / 17.08.2017 9865 Lifestyle
Давлат ва ОАВ: Ахборот майдонида монополияга чек қўйиш вақти келди
22:00 / 16.08.2017 20537 Ўзбекистон
Ливан Сурия чегараси яқинида ҳарбий юриш бошлади
08:57 46 Жаҳон
Венесуэла президенти коррупцияга алоқадорликда айбланди
08:57 15 Жаҳон
АҚШ Руминияга 1,25 млрд долларлик ракета тизимлари етказиб бермоқчи 
08:53 26 Жаҳон
Цукерберглар оиласида иккинчи фарзанд дунёга келди
08:39 623 Жаҳон
АҚШ ИШИДни мағлуб қилгандан кейин Сурияни тарк этишга ваъда берди 
08:05 1694 Жаҳон
Кўпроқ янгиликлар