АҚШ давлат котиби Рекс Тиллерсоннинг фикрича, Россия Нидерландия ва Франциядаги сайловларга аралашган.

"Менинг фикримча, ҳа", - деди у, АҚШ сенатидаги эшитувларда бу борадаги саволга жавоб бераркан.

Шунингдек, Тиллерсон сенаторлардан бирининг Россия кучсиз бўлган НАТОдан манфаатдор экани ҳақидаги фикрига ҳам қўшилган.

Ғарб сиёсатчилари рус хакерларини сайловлар жараёнига аралашишда айблашмоқда. Хусусан, бундай айбловлар билан АҚШ Демократик партияси вакиллари ва Франциянинг сайланган президенти Эммануэль Макрон чиқди.

Россия бундай айбловларни рад этиб келмоқда, РФ президентининг матбуот котиби Дмитрий Песков эса уларни “асоссиз шовқин кўтариш” дея атади.

Россия ТИВ раҳбари Сергей Лавров мамлакатнинг АҚШ, Франция ва Германиядаги сайловларга эҳтимолий аралашуви ҳақида гапирар экан, буни тасдиқловчи далиллар йўқ эканини иддао қилди.