Вашингтонга сафар билан келган Саудия Арабистони ташқи ишлар вазири Одил ал-Жубайр Қатарга қарши киритилган чораларни қамал эмас, бойкот деб атади ва қиролликнинг Қатарга ёрдам жўнатишга тайёрлигини билдирди.

"Техник жиҳатдан бу қамал эмас. Биз уларга ҳаво ҳудудимиздан фойдаланишни тақиқлаш ҳуқуқимиздан фойдаланмоқдамиз. Биз оилаларга давлатдан давлатга ўтишга рухсат берганмиз, биз уларни айирмаяпмиз ва зарур бўлса, Қатарга озиқ-овқат ва дори-дармон тақдим қилишга тайёрмиз", деб айтди ал-Жубайр америкалик ҳамкасби Рекс Тиллерсон билан учрашув олдидан.

Ал-Жубайрнинг айтишича, Қатарнинг денгиз портлари ва аэропортлари очиқ, уларга нисбатан қамал йўқ, киритилган тақиқлов эса фақатгина Қатар самолётларига тегишлидир. "Қатар истаган жойига товарлар етказиши мумкин, шунчаки улар бизнинг ҳудудий сувларимизга кирмаслиги лозим", деб таъкидлаб ўтди ал-Жубайр.