«Реал»нинг солиқларни тўлашдан бўйин товлашда айбланаётган ҳужумчиси Криштиану Роналду адвокати Лобо Хавьернинг маълум қилишича, унинг мижози даромадларини яширмаган. Шунингдек, унинг таъкидлашича, Криштиану билан боғлиқ вазиятни «Барселона» форварди Лионель Месси машмашаси билан таққослаш нотўғри.
 
«Даромадлар яширилмаган, декларация бор эди, у қандайдир сабаблар туфайли испан солиқ бошқармасига ёқмаган. Бироқ ҳеч битта қонун ёки норма ўйинчи ниманидир бузганини белгилаб бера олмайди.

Месси ва солиқ идораси таъқиб этган бошқа ўйинчилар билан боғлиқ ҳолатлар умуман бошқа, сабаби улар ҳеч нарсани декларациядан ўтказишмаган. Роналду эса, унинг ишини суриштирувдан ўтказишни бошлаганларига қадар, даромадларнинг ўзи керакли, деб ҳисоблаган қисмини декларациядан ўтказди», - дея Хавьернинг сўзларини келтиради Cadena Ser. 

Португалия терма жамоаси футболчиси 2011-2014 йиллар давомида 14,7 млн евролик солиқларни тўлашдан бўйин товлаганликда айбланмоқда. Хусусан, матбуотнинг хабар беришича, футболчи буни 2010 йилда ташкил этган жамоат ташкилоти ёрдамида қилган. Роналду имидж ҳуқуқларидан олган пулларни ҳам тўламасликда айбланмоқда. Умумий ҳисобда ўйинчи Испания солиқ органларига қарши тўртта жиноятда айбланди.