Туркиянинг асосий мухолиф партияси Халқ-республикаси партияси депутати Энис Берберўғлу давлат сирини ошкор қилганлик учун 25 йиллик қамоқ жазосига маҳкум қилинди. Бу ҳақда суддаги манбага иқтибос келтирган ҳолда NTV телеканали хабар бермоқда.

Таъкидланишича, Берберўғлу Миллий разведка ташкилотининг (MIT) Сурияга кетаётган юк машиналарини тинтишда айбланмоқда.

Юк машиналари билан боғлиқ воқеа ҳарбийлар 2014 йил январда Адана вилоятида MIT’га тегишли бўлган ва Туркия-Сурия чегарасига кетаётган юк машиналарини кўздан кечиришганда юз берган. Cumhuriyet нашри юк машиналари тинтув қилинаётган вақтдаги сурат ва видеоларни чоп этган. Фото ва видеоматериалларда артиллерия снарядлари, миналар ва бошқа ўқ-дорилар солинган қутиларни кўриш мумкин бўлган. Туркия ҳукуматининг айтишича эса юк машиналар суриялик туркманларга "логистик ва гуманитар ёрдам" олиб кетаётган бўлган. Юк машиналарини тинтув қилиш иши бўйича 17 нафар турк ҳарбийси ҳамда Адана вилояти жандармериясининг собиқ бошлиғи ва собиқ бош прокурори ҳибсга олинган. 

Ушбу ишга алоқадор бўлган Берберўғлу суд ҳукми чиқарилиши билан ҳибсга олинди. Халқ-республикаси партияси раҳбари Кемал Қиличдарўғлу Берберўғлунинг ҳибсга олиниши муносабати билан партия ижроия қўмитасининг фавқулодда йиғилишини чақиртиришини эълон қилган.