Мўғулистонда кашмири (юнг газлама) ишлаб чиқариш бўйича дунёдаги энг йирик компания «Гоби» фабрикасида ёнғин юз берди. Ёнғин 14 июнь куни бошланган ва 10 соатдан ортиқ давом этган. Бу ҳақда Regnum.ru хабар берди.

Ёнғин мамлакатда сўнгги йигирма йил ичида юз берган энг йириги, деб аталди. Мамлакат тезкор хизматлари матбуот маркази хабарига кўра, тахминан 30 минг квадрат метр жой ёниб кетган. Ўт ўчириш ишларида 150 нафар ёнғин хизмати ходими, 30 дан ортиқ ёнғин машиналари ва 50 дан ортиқ полиция ходимлари ўн соат давомида иштирок этган.

Фабрика биносида бўлган барча кишилар хавфсиз жойга кўчирилди, жабрланганлар йўқ. 

«Гоби» акциядорлик компанияси Мўғулистоннинг энг машҳур корхонаси бўлиб, мамлакат учун валютанинг асосий манбаси ҳисобланади.