Ўқувчиларнинг таътил кунларини мароқли ва мазмунли ташкил этиш мақсадида Ўзбекистонда анъанавий равишда ормогоҳлар фаолияти ташкил этилади. Жорий йилда ҳам жами 1150 та (214 та стационар, 936 та кундузги) оромгоҳ ташкил этилиб, уларга ёз мавсуми давомида қарийб 300 мингдан ортиқ болаларни қамраб олиш кўзда тутилган. Бу ҳақда Халқ таълими вазирлиги ахборот хизмати хабар берди.

Умумтаълим мактабларида 4,5 млн. дан ортиқ ўқуувчи таҳсил олиши инобатга олинадиган бўлса, оромгоҳга жалб қилинмаган болалар нима билан машғул бўлади, деган савол кун тартибига чиқади. 

Айни мақсадда Халқ таълими вазирлиги ташабуси билан оромгоҳларга қамраб олинмаган болалар учун “Ёз-2017” концепцияси ишлаб чиқилди. Ушбу концепциянинг асосий мақсади ўқувчиларни бўш вақтларини фойдали меҳнатга йўналтиришдир. 

Мазкур концепцияга кўра республикадаги қурилиш-таъмирлаш ишлари олиб борилмайдиган ҳамда кундузги оромгоҳлар ташкил этилмаган таълим муассасаларида тўгараклар фаолияти йўлга қўйилади. Яъни,

-    Мактабларда “соғломлаштириш майдончалари”;

-    “Баркамол авлод” болалар марказларида тўгараклар;

-    Ахборот-ресурс марказларида китбхонлик машғулотлари ўтказилади. 

Мазкур Концепцияга мувофиқ таълим муассасаларида маданий – маърифий ва спорт тадбирлари жорий йилнинг15 июнидан 15 августигача, ҳафтанинг душанба-жума кунлари давомида ўқувчилар ёшига мувофиқ ташкил этилади.

Муассасаларида белгиланган вақтларда ўқувчиларнинг ёш хусусиятлари инобатга олинган ҳолда давра суҳбатлари, ўйинлар, викториналар, спорт мусобақалари, китобхонлик баҳслари, инглиз тили сабоқлари, мусиқа тўгараги каби турли тадбирлар ташкил этилади.