Баҳрайн Қатарнинг террорчилик ташкилотлари айрим раҳбарлари билан "бевосита алоқалар" ўрнатгани ва уларни молиявий томондан қўллаб-қувватлаганига доир далилларга эгадир. Бу ҳақда Баҳрайн подшоҳлигининг Россиядаги элчиси Аҳмад Ас Соатий РИА Новостига берган интервьюсида сўз юритди

"Бизда Қатарнинг Лондон ёки Дохадаги айрим ташкилотлар ва гуруҳлар раҳбарлари билан бевосита алоқалар ўрнатгани ҳамда уларни молиявий қўллаб-қувватлаганини исботловчи маълумотлар бор", — деган Ас Соатий. 

Унинг сўзларига кўра, Баҳрайн ҳукумати мамлакат ҳудудида Қатар томонидан қўллаб-қувватланаётган террорчиллик гуруҳларини яхши билади. 

"Қатарнинг турли гуруҳлар билан алоқалари борлиги кўп йиллар аввал фош этилган эди. Бироқ, ҳозирда, бу борадаги сабр косаси тўлди. Биз Қатарнинг ўз сиёсатини давом эттираётганини кўриб, ўз хавфсизлигимизга эътиборсиз бўла олмаймиз", — деб қўшимча қилган элчи. 

Эслатиб ўтамиз, Саудия Арабистони, Баҳрайн, БАА ва Миср 5 июнь куни Қатар билан дипломатик муносабатларни узган, бунга Доханинг террорчилик ташкилотларини қўллаб-қувватлагани ва Яқин Шарқдаги вазиятни беқарорлаштираётганини важ қилган эди. Кейинчалик, Ливиянинг шарқий қисми, Яман, Мавритания, Мальдив ороллари ва Маврикий ҳам Қатар билан дипмуносабатларини узганди.