Россиялик шахматчи Сергей Карякин Норвегиянинг Ставангер шаҳрида ўтаётган супер мусобақанинг 8-турида амалдаги жаҳон чемпиони Магнус Карлсенга ютқазди. 

Қора доналар билан ўйнаган Карякин 44-юришда мағлубиятини тан олди. Бу ғалаба 26 ёшли Карлсен учун мусобақадаги биринчи ғалаба бўлди. Россиялик яна бир шахматчи Владимир Крамник франциялик Максим Вашье-Лагравга ютқазди, арманистонлик Левон Аронян ва ҳиндистонлик Вишванатан Ананд, америкалик Хикару Накамура ва Уэсли Со ҳамда америкалик Фабиано Каруана ва голландиялик Аниш Гири дуранг натижа қайд қилишди.

Охирги тур олдидан умумий жадвалга 5,5 очко билан Аронян бошчилик қилмоқда. Унинг ортидан Накамура (5 очко), Гири (4,5), Крамник (4), Со (4), Ананд, Каруана, Вашье-Лаграв ва Карлсен (3,5) келмоқда. Карякин эса 3 очко билан сўнгги ўринни эгалламоқда. Охирги 9-турда Крамник Гири билан, Карякин Вашье-Лаграв билан, Ананд Карлсен билан, Со Аронян билан ва Каруана Накамура билан беллашади.

Карякин ва Гиридан ташкари, бу мусобақанинг барча иштирокчилари дунёнинг энг кучли шахматчилари ўнталигига киради. Мусобақанинг мукофот жамғармаси 249 минг еврони ташкил қилади. Ғолибга эса шу суммадан 70 минг евро тегади.

2016 йил 11 ноябрдан 30 ноябргача Нью-Йоркда Карякин ва Карлсен ўртасида классик шахматлар бўйича жаҳон чемпиони унвони учун мусобақа бўлиб ўтганди. Ўшанда 12 партиядан кейин ҳам ғолиб аниқланмагач, учрашув тақдири тай-брейкда ҳал қилинган ва унда норвегиялик шахмат устаси ғолиб бўлганди.