16 июнь куни Италия кассация суди лобстерларни ресторанлар ошхоналаридаги музда сақлаш мумкин эмаслиги ҳақида қарор чиқарди. Сабаби бундай жараён уларга жисмоний азоб-уқубат келтирар экан.

Аввалроқ суд ҳайвонлар ҳимоячиларининг Флоренцияга яқин ердаги ресторан эгасига қарши даъво аризасини кўриб чиқа бошлаганди. У қисқичбақасимонларни музли қадоқларда сақлаган, ҳамда эндиликда 2 минг евро миқдорида жарима ва 3 минг евролик суд тўловларини тўлаб бериши керак.

Суднинг иддао қилишича, ресторан эгасининг айбини қисқичбақасимонларнинг тирик ҳолда тайёрланиши ҳам ҳаттоки енгиллаштира олмайди.

“Бундай тайёрлаш услубини қонуний, деб ҳисоблаш мумкин, бироқ ҳайвонларнинг тайёрланишга қадар сақланиши билан боғлиқ азоб-уқубатларини бу тарзда оқлаш мумкин эмас”, - дейилади суд қарорида.

Суд бунга муқобил тарзда лобстерларни кислород билан тўйинтирилган сувда хона ҳароратида сақлашни таклиф қилди.