Россия президенти Владимир Путин америкалик режиссёр Оливер Стоунга берган интервьюсида баёнот беришича, Россия ва Барак Обама маъмурияти Сурия бўйича келишувга эришишга яқин бўлган. Бироқ, америкаликлар сўнгги лаҳзаларда, эҳтимол, сиёсий сабаблар туфайли бундан бош тортган.

Путиннинг Стоунга берган интервьюсининг китоб ҳолидаги намунаси 16 июнь куни китоб дўконларига сотувга чиқарилди. Путиннинг русчадаги гаплари инглизчадан таржима қилинган ҳолда берилган. 

"Биласизми, амалда, биз Обама маъмурияти билан Сурияда бирга ишлаш бўйича келишувга деярли эришган эдик", — деган Путин.

"Биз ҳаво кемаларимиз парвозининг хавфсизлиги билан боғлиқ масалаларни мувофиқлаштиришни муҳокама қилдик. Афсуски, бу қилган ягона иш бўлди. Биз олға силжимадик. Биз қўшма ҳаракатлар бўйича келишувга эришмоқчи эдик. Бу уларнинг ва бизнинг маълумотларни таққослаб, террорчи гуруҳлар жойлашуви аниқлашни кўзда тутар эди. Фикримча, биз қарши курашишимиз лозим бўлган нишонларни аниқлашимиз керак эди. Биз қўшма зарбалар бериш бўйича келишувга ҳам яқин турган эдик", — деб ҳикоя қилган Путин.

"Биз бу келишувга эришишга жуда яқин эдик. Аммо, менимча, қандайдир сиёсий сабаблар туфайли, бизнинг америкалик ҳамкорлар сўнгги лаҳзаларда лойиҳадан бош тортишди", — дея қўшимча қилган Путин.