Skype асосчилари уч йил аввал янги Starship Technologies компаниясини очишди ва соатига 6 километр тезликда ҳаракатланувчи робот-курьерларни ишлаб чиқаришни йўлга қўйишди. Бу роботлар дунёнинг турли мамлакатларида синовдан ўтмоқда, куни кеча эса Эстония парламенти ҳам мамлакатнинг барча ҳудудларида робот-курьерлардан фойдаланиш ғоясини қўллаб-қувватлади. Hi-News шу ҳақида хабар берди. 

Барчаси қонуний бўлиши учун робот бир метрдан баланд  бўлмаслиги керак. Роботнинг вазни 50 килограмм билан чегараланади, корпуси эса албатта оқ рангда бўлиши лозим. Робот-курьерда чироқлар ҳам бўлиши зарур. Starship Technologies роботлари бу талабларнинг барчасига жавоб беради. Шундай экан, тез орада бундай курьерлар бутун Эстония бўйлаб товарларни етказиб бериш билан шуғулланиши мумкин. 

Ўтган йилнинг охирида Starship Technologies роботлари турли мамлакатларда синовдан ўтказила бошланди. Ҳозир уларни 60 шаҳарнинг кўчаларида учратиш мумкин, бироқ роботларнинг у ердаги ҳаракатларини тўла қонунли деб бўлмайди, улар имкониятлари жиҳатидан чегараланган. Баъзи мамлакатларгина бундан мустасно. Масалан, Американинг Виржиния ва Айдаҳо штатларида роботларнинг кўчаларда ҳаракатланишинига доир  қонунчиликка тузатиш киритилди, бундан аввал шунга мувофиқ қонун қабул қилинган Сан-Францискода эса, аксинча, роботларнинг хизмати муносиб баҳоланмади.