«Бавария» ҳужумчиси Роберт Левандовскининг агенти Маик Бартель маълум қилдики, польшалик футболчи клубда ўзига бўлган муносабатдан норози.

Ушбу ҳужумчининг ҳисоблашича, клуб ўзининг бундеслига тўпурари бўлиши учун етарлича ёрдам кўрсатмаган. Якунланган мавсумнинг 34-турида Дортмунднинг «Боруссия» клуби ҳужумчиси Пьер-Эмерик Обамеянг дубль қайд этди ва Левандовскини 1 голга ортда қолдириб кетди.

«Бавария» ушбу турда «Фрайбург»ни йирик ҳисобда мағлуб этганди (4:1). Голларни Арьен Роббен, Артуро Видаль, Франк Рибери ва Йозуа Киммиҳ урган, Левандовски фақат охирги голга пас берган.

Агент ўз мижозининг сўзларини келтиради.

«Роберт менга айтдики, уни жамоадошлари қўллаб-қувватламади, мураббий [Карло Анчелотти] унга охирги турда ҳам гол уриб, мавсум бомбардири бўлишига имконияти яратиб бермади.

У бундан жуда қаттиқ хафа бўлган. Мен аввал уни бу аҳволда кўрмаганман. У жамоаси ўзига ёрдам беришидан умид қилганди», – дейди агент Kicker учун берган интервьюсида.

Левандовскининг ўзи ҳам олдинроқ шу мавзуда гапириб ўтганди.

«Ҳозир жаҳлимдан тушганман. Мен жамоа менга ёрдам бермаганидан норози бўлгандим.

Охирги турда улар мени ранжитишди», – деганди футболчи ESPN нашрига.

Қайд этиш керакки, ушбу футболчи ўз клубининг қўллаб-қувватловига эриша олмагани туфайли «Реал»дан кетаётган Криштиану Роналдуга ўринбосар сифатида кўрилмоқда.