АҚШ президенти Дональд Трамп 19 июнда АҚШнинг етакчи юқори технологик компаниялари раҳбарлари билан учрашув ўтказди. Компаниялар раҳбарлари Трампга ўз ишларидаги устувор вазифалар ҳақида сўзлаб беришди.

Оқ уй матбуот хизматининг маълум қилишича, учрашувда 20 га яқин тадбиркор, жумладан Alphabet, Apple, Amazon, Microsoft, IBM, Intel, MasterCard ва бошқа компаниялар раҳбарлари иштирок этди. Учрашувда, шунингдек, Трампнинг азалий тарафдори ва таниқли инвестор Питер Тиль ҳам бўлган.

Трамп учрашувда янги иш ўринларини яратиш у мақсад қилган устувор вазифа бўлиб қолаётганини таъкидлаб ўтган. "Биз АҚШда технологияларга катта устунлик берамиз, бу жуда муҳим соҳа. Мен бунга иш ўринлари ва бошқалар нуқтаи назаридан қарайман. Сиз эса бунга бошқачароқ қарайсиз. Бироқ бизнинг ҳаммамиз бир фазодамиз", деб айтди Трамп. У жорий маъмурият инновацияларни рағбатлантириш, солиқларни камайтириш ва юқори технологик компаниялар хорижлик мутахассисларни жалб қилишига эришиш ниятидалигини айтган. Компаниялар раҳбарлари эса Трамп томондан ишчи визалар берилиши тартибининг қатъийлаштирилиши соҳага салбий таъсир қилишидан хавотирланмоқдалар.

Трамп, шунингдек, АҚШ ҳукумат тузилмаларида қўлланувчи технологияларда инфратузилмани киберҳужумлардан яхшироқ ҳимоялаш ва фуқароларга яхшироқ сифатдаги хизматларни тақдим қилиш учун катта ўзгаришлар қилишга ваъда берди. Трампнинг айтишича, бу чоралар солиқларни камайтириш билан биргаликда бюджетга яқин 10 йил ичида триллион доллар тежашга имкон беришини айтди.