Украина Олий радаси спикери Андрей Парубийнинг маълум қилишича, АҚШ билан хавфсизлик масалалари бўйича битим имзоланса, Украина ҳудудида америкалик ҳарбийлар жойлаштирилиши мумкин. Бу ҳақда «Украинские новости» хабар берди.

«У (битим) махсус амалиётлар, қўшма илмий-техникавий ишланмалар ва ҳаттоки Украина ҳудудида Америка Қўшма Штатлари ҳарбийларини жойлаштиришни назарда тутади», - деди Парубий.

Рада спикерининг кўрсатишича, шундай битимлар амалиёти АҚШда анчадан бери қўлланилади ва тегишли ҳужжатлар Япония, Австралия ҳамда Исроил билан имзоланган. Парубийнинг қайд этишича, битимни имзолаш мудофаа бўйича учар қурилмаларни олиш учун устувор ҳуқуқ беради.