Франциянинг янги президенти Эммануэль Макрон мамлакат қуролли кучларининг 2011 йилда Ливиядаги операцияда иштирок этганини хато деб атади ва бундай сценарий Сурияда такрорланиши мумкинлигидан огоҳлантирди.    

"Мен билан бирга Францияга 10 йил аввал импорт қилинган неоконсерватизм шакли тугайди. Демократияни халқларни жалб қилмасдан, ташқаридан олиб келиб бўлмайди. Франция Ироқдаги урушда қатнашмаган ва у бунда ҳақ бўлган. Бироқ у Ливиядаги урушга аралашиб, хато қилган. Бу ҳаракатларнинг натижаси нима билан якунланди? Террорчилик гуруҳлари гуллаётгани ва барбод қилинган давлатлар билан. Мен бу Сурияда ҳам юз беришини истамайман", деб айтди Макрон Европа ОАВга берган интервьюсида.

2011 йил феврали ўрталарида Ливияда мамлакатни 40 йилдан кўпроқ бошқарган Муаммар Каддафийнинг ҳокимиятдан кетиши талаби билан оммавий намойишлар бошланганди ва улар охир-оқибат ҳукумат қўшинлари ва исёнчилар ўртасидаги қуролли тўқнашувга айланиб кетган. НАТО ўша йилиёқ Ливияда ҳарбий кампанияни бошлаган.

Каддафий 2011 йил октябрда ағдариб ташланиб, ўлдирилгандан кейин мамлакатда икки ҳокимлик вужудга келган. Шу билан бирга Ливиянинг бир қатор ҳудудлари умуман марказий ҳокимият томонидан назорат қилинмайди, бу ерларда ИШИД жангарилари фаол ҳаракат қилади.