Муқобил транспорт коридорларининг очилиши, хусусан жанубий йўналишда Трансафғон транспорт коридорининг йўлга қўйилиши Ўзбекистонга катта иқтисодий имкониятлар очиб бериши мумкин. Халқаро Пресс-клубнинг навбатдаги йиғилишида Олий Мажлис Сенат раиси биринчи ўринбосари Содиқ Сафоев шу мавзуга алоҳида тўхталди. "Кун.уз" мухбири шу ҳақида хабар берди. 

"Афғонистондаги тинчлик биринчи навбатда у ерда олиб борилаётган бунёдкорона ишлар билан боғлиқ. Хитойлик ҳамкорлар билан ҳам гаплашганда, улар ҳам қаерда йирик лойиҳалар амалга оширилаётган бўлса, ўша ер тинч бўлади деб айтишмоқда. 

Афғонистондаги тинчлик Ўзбекистонгга нима учун керак? Аввало, бу портларга чиқиш учун катта имконият. Бугунги кунда темир йўллар тизими шундай жойлашганки, Ўзбекистондан биринчи портларга бориш учун 20-22 кун керак бўлади. Башарти, Трансафғон йўлаклари очилиб, Уммон, Форс кўрфази, Покистондаги портларга темир йўл ўтадиган бўлса, бунга атиги 1-2 кун кетади. 20 кун қаерда-ю, 2 кун қаерда?! Бу биз учун жуда катта имконият, албатта, дея таъкидлади Сафоев. 

"Бундан ташқари, Афғонистон - жуда катта бозор. Бежизга Ўзбекистон Афғонистон бўйича шахсий вакилини таъсис этмади. Унинг асосий вазифаси - Ўзбекистоннинг тегишли идора ва ташкилотлари эътиборини Афғонистондаги лойиҳаларни амалга оширишга қаратиш ва икки мамлакат ўртасидаги савдони сифат ва миқдор жиҳатидан янги поғонага кўтариш. 

10-12 йил олдин Ўзбекистоннинг Афғонистон билан савдо алмашинуви нолга тенг эди. Бугун у ярим миллиарддан ошиб бормоқда, ҳозир бу кўрсаткични 1,5 миллиардга кўтариш режалаштирилган. Демак, Афғонистон Ўзбекистон учун катта имкониятлар манбаи ҳисобланади", - қўшимча қилди спикер.