Инсон ҳаётий дунёда умргузаронлик қилар экан, Аллоҳ томонидан унга тақдим этилган имкониятлардан фойдаланган ҳолда икки дунё саодатманди бўлиш учун захира тўплайди. Бу имкониятларни ҳар ким ҳам кўриб, англаб етавермайди. Яратганнинг ўзи бандасига бу имкониятларни англаш учун ҳикмат бериб қўяди. Рамазон кунлари, айниқса, Лайлатул Қадр кечаси ана шундай имкониятлардан биридир.

Аллоҳга шукрлар бўлсинки, бу йилги Рамазон ойида юртимиз масжидлари ҳақиқий мўмин-мусулмон, ихлосманд ва Яратган марҳаматидан умидвор инсонлар билан тўлиб-тошди. Хатмонлар, таровеҳ намозлари ва дуои-зикрлар бу кунларнинг файзига файз қўшди. Жумладан, Рамазоннинг 27-кунига ўтар арафасида Қадр кечасининг кутиб олиниши ҳам ўзгача шукуҳли ва тароватли бўлди.

Пойтахтнинг “Мирзо Юсуф” жоме масжидида Аллоҳ розилиги ва савобни ният этиб тўпланган мўмин-мусулмонлар бу кеча файзидан, раҳматидан, баракасидан умидвор ҳолда дуога қўл очишди. Муҳаммад Лойиқ қори Абдулвоҳид ўғли Хатми Қуръон дуосини ўқиганда қалблар тўлқинланди, “омийн” дея дуолар мустажобидан умид қилинди. Дуо олишнинг улуғ фазилат эканлиги, қилинган дуолар қабул бўлишидан тақдирлар ўзгариб кетиши ҳақида Пайғамбаримиз Муҳаммад (с.а.в)нинг муборак ҳадисларида марҳамат қилинган. Барча мўмин-мусулмонларнинг шу кечада қилган дуолари Яратган ҳузурида мақбул бўлишини ихлос ила ният қилиб қоламиз.