Лондоннинг Камден тумани раҳбарияти ёнғин хавфсизлиги мақсадида Chalcots Estate микротуманидаги 5 та кўп қаватли бинода яшовчи одамларни вақтинчалик бошқа жойга кўчиришга қарор қилди. Гап шундаки, ушбу бинолар ҳам ёниб кетган Grenfell Tower биноси каби ташқи қоплаш материаллари билан қоплаб чиқилган.

Бу ҳақда Камден округи кенгаши раҳбари Жоржия Гулд Sky News телеканали эфирида маълум қилди.  

"Grenfell’даги ёнғин барчасини ўзгартирди – биз одамларни фалокатдан сақлаш учун барча ишни қилишимиз лозим", деб айтди Гулд ва шаҳар аҳолиси хавфсизлиги муниципал ҳокимиятнинг асосий вазифаси эканлигини таъкидлаб ўтди. 

Умумий ҳисобда бу бинолардан 800 га яқин оила кўчирилади. Ҳозирча улар яқин орадаги спорт-кўнгилочар мажмуасига кўчириладилар. Сўнгра дўстлари ва яқинлариникида вақтинчалик яшашга имкони бўлмаганлар меҳмонхоналарга жойлаштириладилар.

Гулднинг айтишича, уйларнинг қопламасини ёнғинга бардошлисига алмаштириш бўйича ишлар 3-4 ҳафта давом этади.

14 июнда Grenfell Tower’да содир бўлган ёнғин туфайли 79 киши ҳалок бўлганди.