Тошкентдаги Инҳа университетининг (IUT) 100 нафарга яқин 4-курс талабалари ўқишни Жанубий Кореяда давом эттириш учун ушбу мамлакатга йўл олдилар. 

IUT матбуот хизматининг маълумотларига кўра, талабалар бир ўқув йили давомида Жанубий Кореядаги Инҳа университетида таҳсил оладилар. Улар Жанубий Кореянинг етакчи олий таълим муассасаларидан бирида таълим олиш имконига эга бўлдилар. 

Тошкентдаги ва Жанубий Кореядаги Инҳа университетлари ўртасидаги келишувга кўра, IUT’нинг "Компьютер ва дастурий инжиниринг" факультетининг 99 талабаси 2017 йил 23 июнда Инчхонга жўнаб кетдилар.

Улар Жанубий Кореяда 28 июндан ўқишни бошлаб юборадилар. Ўзбекистонлик талабалар ўқиш давомида Жанубий Кореянинг диққатга сазовор жойлари ва корейс халқи маданияти билан танишиш имконига эга бўладилар. Ўқиш 2017 йил декабрда якунланади.

Тошкентда Жанубий Кореяга кетаётган талабаларни кузатиш маросими бўлиб ўтди. Учрашув давомида IUT ректори Сарвар Бобохўжаев талабаларга хориждаги ўқишларида омад тилаб қолди. У талабалар барча кучларини ўқишга йўналтиришлари ва хорижий университетда Ўзбекистонни муносиб тақдим қилишлари кераклигини айтди.

Маросим давомида 2016-2017 ўқув йилининг 2-семестри якунлари бўйича академик грантлар соҳиблари мукофотланди. Инҳа университети ҳар бир семестр бўйича ҳар бир курсдан 10 нафар энг яхши талабани аниқлаб олади. Бу талабалар бир семестрга ўқиш учун ҳақ тўлашдан тўлиқ ёки қисман озод этиладилар.