Ўзбекистон заминида пишиб етиладиган сархил мева-чева ва сабзавотларга чет элларда талаб жуда катта. 

Асака тумани “Обод турмуш орзуси” фермер хўжалигида йилига 1 миллион долларлик маҳсулот экспорт қилиш салоҳиятига эга мева-сабзавот маҳсулотларини қайта ишловчи корхонанинг очилиш маросими бўлиб ўтди. Хўжаликка 850 минг АҚШ доллари қийматидаги лойиҳа асосида замонавий ускуналар чет элдан олиб келиб ўрнатилди.

Шу йилнинг март ойида Андижон вилояти ҳокими бошчилигидаги делегация Россия давлатининг Новосибирск ва Красноярск ўлкаларида бўлган чоғида тадбиркорларимиз маҳаллий ишбилармонлар билан мева-савбзавот етказиб бериш бўйича кўплаб шартномалар имзолаган эдилар. 

Корхонада фермер хўжалигининг мавжуд 200 гектар ер майдонида етиштирилган маҳсулотларидан ташқари, вилоятнинг Балиқчи, Шаҳрихон ва Андижон тумани деҳқон ва боғбонлари томонидан етиштирилган ҳосил қайта ишланади.

Ишлаб чиқариш объектининг ишга тушириш маросимида Андижон вилояти ҳокими Шуҳратбек Абдураҳмонов иштирок этиб, ишлаб чиқариш жараёни билан танишди.

- Корхонамиз йилига 150 минг тонна маҳсулот ишлаб чиқариш қувватига эга бўлиб, Россия, Қозоғистон, Тожикистон ва Бельгия каби давлатлари билан экспорт бўйича шартномалар имзоланган, - дейди завод иш юритувчиси Муҳиддин Ғафуров. –Масканимизда 150 нафар иш ўрни яратилган ва келажакда бу рақамлар сони ортиб боради.

Kun.uz мухбири Элмурод Эрматов, Андижон