50 мингга яқин бельгиялик, германиялик ва голландияликлар 25 июнда Бельгиядаги "Тианж" АЭСининг иккинчи ва "Дул" АЭСининг учинчи реакторини ёпиш талаби билан оммавий намойишларда иштирок этдилар, деб хабар бермоқда Бельгия ОАВ. Намойиш ташкилотчиларининг таъкидлашича, намойиш иштирокчилари ёнма-ён туриб, узунлиги 90 км лик трансчегаравий занжирни ташкил қилишган.  

Маълумотларга кўра, бу занжир Бельгиядаги Льеж яқинида жойлашган "Тианж" АЭСини Германиядаги Ахен ва Нидерландиядаги Маастрихт шаҳарлари билан боғлаши керак эди.

Бельгия билан қўшни бўлган, вақт ўтиб ядровий энергетикадан воз кечишга қарор қилган  Германия, Люксембург ва Нидерландия АЭСлар ҳолати ва ёшидан хавотир билдиришмоқда.

Намойишчилар анчадан бери ишлатилиб, эскириб қолган ва корпусларида микродарзлар аниқланиши сабабли 2 йилдан кўпроққа тўхтатилиб, 2015 йилда яна ишга туширилган "Тианж 2" ва "Дул 3"ни дарҳол тўхтатишни талаб қилишган.

Бельгия ҳукумати халқаро мутахассислар билан бир қатор синов ва маслаҳатлашувлар ўтказгач, реакторларни яна ишга туширишга рухсат берганди.

Бу ҳолат Бельгия ва унга қўшни давлатлардаги жамоатчиликни хавотирлантирмоқда. Намойишчилар, шунингдек, амалдаги ҳукуматнинг қолган эскириб қолган реакторлар ишлаш муддатини яна 10 йилга узайтириш қарорига қарши чиқишмоқда.