Россия ҳукумати одам савдосига қарши курашиш бўйича етарлича саъй-ҳаракатларни амалга оширмаяпти, мамлакат ҳудудида эса Шимолий Корея фуқаролари меҳнат лагерлари фаолият юритади. Бу ҳақда АҚШ давлат департаментининг 27 июнда чоп этилган одам савдосига қарши курашиш бўйича ҳисоботида айтилган.

"Россия ҳукумати Шимолий Корея билан икки томонлама келишувлар муддатини узайтирди. Бу келишувларга кўра, Россияда Шимолий Корея меҳнат лагерлари фаолият юритади, уларда минглаб шимолий кореяликлар мажбуран ишлатиладилар", деб айтилган ҳужжатда.

Ҳисоботда айтилишича, Шимолий Корея ҳар йили Россияга ўзининг 20 мингга яқин фуқаросини ишлашга юборади. Бундан ташқари, Россияда ишловчи 30 минг шимолий кореялик зўравонлик билан меҳнат қилишга мажбурланади. 

Давлат департаменти маълумотларига кўра, улардан кўпчилиги кунига 20 соатдан ишлашга мажбурлар, уларнинг маошлари эса Шимолий Корея ҳукуматига жўнатилади ва Пхеньян шу тариқа йилига юзлаб миллион долларлар топади.

Давлат департаменти қаторасига бешинчи йил Россияни ҳукуматининг саъй-ҳаракатлари АҚШнинг одам савдосига қарши курашиш қонунчилиги стандартларига умуман жавоб бермайдиган давлатлар қаторига қўшиб келади.
 
"Россия ҳукумати одам савдосига қарши курашишнинг минимал стандартларини ҳам бажармайди ва бу йўналишда сезиларли қадамларни амалга оширмайди", дейилган ҳужжатда.